(ဘဝသမားေလးမွ အားလံုးကိုေလးစားလွ်က္)
တရားခံတစ်ဦးရဲ့ရှိုက်သံ
အပြင်မှာ အရမ်းအေးနေပြီအမေ
ခွေးတွေကလည်း ဟောင်နေပြီ
နေဝန်းကလဲ ရှောင်ပုန်းတော့မယ်
သားအရမ်းကြောက်တယ်အမေ
ဒီလိုမလုပ်ပါနဲ့အမေရယ်
အဖေ့ကို စိတ်နာရုံသက်သက်နဲ့
ကျွန်တော်ဘဝကို ထိုးမချပါနဲ့
ဒီလောကအကြောင်းကို
သားမသိသေးဘူးအမေ
ဟုတ်တယ်အမေ
ကျွန်တော်ဘဝမီးအိမ်က
လင်းရုံသာ လင်းခဲ့တာ
ထိန်ထိန်သာခွင့် မဲ့နေပြီ
အမြန်လာခေါ်ပါတော့
လောကကြီးတစ်ခုလုံး
အမှောင်ဖုံးလွှမ်းတော့မယ်
သားကြောက်တယ် အမေရယ်
လောက သင်ခန်းစာတွေ
သား မသိသေးဘူးအမေ
အတောင်မစုံခင်
ကံကြမ္မာရိုင်းတွေရဲ့ကြား
ဆင်ကန်းတစ်ကောင်လို
သားတောမတိုးချင်ဘူး
လာခြင်းကောင်းသော
နေ့သစ်တွေအတွက်
ကြိုတင်အရောင် မဆိုးပါနဲ့
သားဘဝက အဖြူထည်မို့ပါ
ပြည့်နေတဲ့မျက်ဝန်းအိမ်မှာ
ဘောင်ဘင်ခတ်နေတဲ့
ကျွန်တော်မျက်ရည်တွေက
ဖိတ်တဝက်စင်တဝက်
ထစ်ကနဲ့ဆို တာကျိုးသလိုမျိုး
မျက်ဝန်းထောင့်မှာသောကတွေ
လှိုက်လှိုက်တက်လာတာ
အမေ မသိလေလျော့သလား
သိလျှက်ပါပဲ နင်းချေခဲ့သလား
မလုပ်ပါနဲ့ အမြန်လာခေါ်လှည့်ပါ
အပြင်မှာမှောင်ရိပ်သန်းနေပြီ
သားကြောက်တယ် အမေရယ်
